master de tradutzione e comunicatzione in limba sarda

Master de tradutzione e comunicatzione in limba sarda
Nùgoro - A pustis de s’esitu bonu de sos annos colados, in su mese de freàrgiu est incumintzada sa quarta editzione de su Master de tradutzione e comunicatzione in limba sarda.
Sas letziones si fàghent in Nùgoro, in unu de sos laboratòrios de informatica de su Litzeu scientìficu “E.Fermi”.
Est organizadu dae s’universidade de Nùgoro in collaboratzione cun s’universidade de Bartzelona. Frecuentadu dae batordighi laureados in matèrias diferentes at s’obietivu de formare espertos in sa tradutzione de testos dae sas diversas limbas in LSC, sa limba sarda comuna, chi est sa limba ufitziale de sa Regione Sardigna.
Sos profesores benint dae s’universidade de Bartzelona e de Tatari e sas matèrias imparadas sunt vàrias: teoria de sa tradutzione, informatica, linguistica.
In su master insegnant espertos de gionalismu televisivu e de sos giornales e tecnicos de publitzidade e economia. Sas oras de letziones prevididas sunt 320 e su cursu, duncas s’at a si concluire a sa fine de su mese de lampadas.
“Est de seguru un’esperientzia interessante e un’ocasione pro connòschere dae a curtzu espertos e realtades diferentes dae sas nostras” narat una laureada in limbas e literaturas istrangias, chi frecuentat pro sa prima borta su master e “Est finas una manera pro praticare sa limba e imparare sas normas chi ant a servire pro iscrivere sos documentos e sos atos ufitziales de sa nostra Regione” agiùnghet unu profesore de literas in s’iscola media de una bidda accante a Nùgoro.
S’ispetzialitzione pigada in su master at a podere èssere usada in diferentes impreos: s’iscola, s’informatzione, sa publitzidade, sos entes locale (in sos isportelos linguisticos).
Teresina